Dhjetë raste të dhunës në familje brenda 24 orëve në Kosovë, arrestohen disa persona

featured
0
Shpërndaj

Shpërndaje këtë postim

ose kopjo linkun

Dhjetë raste të dhunës në familje janë raportuar brenda 24 orëve në disa qytete të Kosovës, përfshirë Prishtinën, Obiliqin, Pejën, Klinën, Malishevën dhe Gjakovën, sipas raportit 24-orësh të Policisë së Kosovës.

Rastet e raportuara përfshijnë dhunë fizike, psikike dhe kanosje ndaj bashkëshorteve, fëmijëve, prindërve dhe anëtarëve të tjerë të familjes.

Në Prishtinë janë raportuar tri raste të dhunës në familje. Në njërin prej tyre, një person është arrestuar nën dyshimin se kishte ushtruar dhunë fizike ndaj bashkëjetueses së tij. Gjatë ndërhyrjes, policia ka sekuestruar një pistoletë me shtatë fishekë, ndërsa i dyshuari është dërguar në mbajtje me vendim të prokurorit.

Dy rastet e tjera në kryeqytet kanë të bëjnë me dhunë të vazhdueshme fizike ndaj një të miture nga vëllai i saj dhe dhunë fizike e psikike ndaj një vajze të mitur nga babai i saj. Viktima në rastin e parë është dërguar në strehimore, ndërsa të dyshuarit janë liruar në procedurë të rregullt.

Raste të tjera janë regjistruar edhe në Obiliq dhe Klinë. Në Obiliq, një person është arrestuar nën dyshimin se kishte sulmuar fizikisht babanë e tij, i cili ka pranuar trajtim mjekësor. Edhe në Klinë është arrestuar një person, i dyshuar për ushtrim të dhunës fizike ndaj bashkëshortes.

Ndërkohë, në Pejë janë raportuar tri raste. Një grua ka denoncuar bashkëshortin për dhunë psikike, por i dyshuari ende nuk është lokalizuar dhe ndodhet në kërkim të policisë. Në rastin e dytë, një baba dyshohet se ka ushtruar dhunë psikike ndaj vajzës së tij, ndërsa është liruar në procedurë të rregullt. Rasti i tretë ka të bëjë me kanosje dhe dhunë në familje, ku viktimë është bashkëshorti, ndërsa e dyshuar bashkëshortja e tij, e cila dyshohet se në vazhdimësi kishte ushtruar dhunë fizike dhe psikike ndaj familjarëve.

Në Malishevë, një person është arrestuar nën dyshimin se vazhdimisht kishte shkaktuar probleme në familje dhe kishte ushtruar dhunë fizike ndaj prindërve të tij. Viktimave u është ofruar ndihmë mjekësore, ndërsa i dyshuari është dërguar në mbajtje.

Një rast tjetër është raportuar në Gjakovë, ku një person dyshohet se kishte keqtrajtuar fizikisht vëllain e tij. Viktima ka pranuar trajtim mjekësor, ndërsa i dyshuari është dërguar në mbajtje.

Rastet janë duke u trajtuar nga organet kompetente, ndërsa disa nga të dyshuarit janë dërguar në mbajtje, të tjerë janë liruar në procedurë të rregullt dhe njëri vazhdon të jetë në kërkim të policisë.

Adresa juaj email s’do të bëhet publike. Fushat e domosdoshme janë shënuar me një *

0/30 karaktere

Hyr

Hyni ose krijoni një llogari tani për të përfituar nga privilegjet e Gazetabruto.com, dhe plotësisht falas!

Hyr