Shoqata Kombëtare e Gjyqtarëve të Shqipërisë ka dënuar djegien dhe dëmtimin e objekteve të Gjykatës së Lartë dhe Gjykatës së Apelit gjatë protestave në kryeqytet.
Në reagimin e saj, Shoqata ka bërë të ditur se zjarrvënia në mjediset e Gjykatës së Lartë dhe dëmtimi i dosjeve gjyqësore rrezikojnë sigurinë e personelit dhe pengojnë funksionimin normal të drejtësisë.
Sipas Shoqatës, cenimi i gjykatave mund të vonojë proceset gjyqësore dhe dobëson mbrojtjen e lirive dhe të drejtave kushtetuese të qytetarëve.
Ajo ka shprehur shqetësim edhe për mungesën e masave të mjaftueshme parandaluese nga Policia e Shtetit, si dhe për deklaratat e kryeministrit Edi Rama ndaj gjyqtarëve që kanë shqyrtuar masat e sigurisë për protestuesit.
Shoqata ka theksuar se kritikat ndaj vendimeve gjyqësore nuk duhet të shndërrohen në sulme personale apo presion ndaj gjyqtarëve, duke kërkuar masa të menjëhershme për sigurinë e institucioneve të drejtësisë dhe respektimin e pavarësisë së tyre.
