Një takim i paprecedentë mes tre liderëve më të fuqishëm të botës pritet të zhvillohet javën e ardhshme në Kinë. Presidenti amerikan Donald Trump, presidenti rus Vladimir Putin dhe presidenti kinez Xi Jinping kanë planifikuar të takohen më 19 nëntor në qytetin Shenzhen, në kuadër të samitit të organizatës për Bashkëpunim Ekonomik të Azi-Paqësorit (APEC).
Shtëpia e Bardhë ka konfirmuar planet për këtë takim trepalësh, i cili konsiderohet historik, pasi do të ishte hera e parë që tre liderët zhvillojnë një takim të përbashkët në këtë format.
Sipas raportimeve të mediave ndërkombëtare, në fokus të diskutimeve pritet të jenë çështjet e sigurisë globale, armët bërthamore dhe zhvillimet në Lindjen e Mesme, veçanërisht lufta në Iran.
Një prej temave kryesore pritet të jetë mundësia e arritjes së një marrëveshjeje për kontrollin dhe reduktimin e arsenaleve bërthamore të tri fuqive. Kjo çështje merr rëndësi të veçantë pas skadimit të marrëveshjes së fundit për kontrollin e armëve bërthamore mes SHBA-së dhe Rusisë, në shkurt të këtij viti.
Presidenti Trump ka shprehur interesimin për një marrëveshje të re që do të përfshinte edhe Kinën, ndërsa Pekini deri më tani ka treguar pak gatishmëri për t’u përfshirë në një marrëveshje të tillë.
Në anën tjetër, lufta në Iran pritet të jetë një tjetër çështje e rëndësishme e bisedimeve. Trump synon të diskutojë me homologët e tij mundësitë për t’i dhënë fund konfliktit dhe për të ulur tensionet ndërkombëtare.
Megjithatë, lufta në Ukrainë nuk pritet të jetë pjesë e diskutimeve të përbashkëta trepalëshe, sipas një zyrtari të lartë amerikan. Kjo çështje mund të trajtohet në takime të ndara mes Trumpit dhe Putinit.
Takimi ka ngjallur shqetësim edhe në Ukrainë. Presidenti Volodymyr Zelensky ka shprehur frikën se mund të diskutohen çështje që lidhen me të ardhmen e vendit të tij pa praninë dhe pjesëmarrjen e përfaqësuesve ukrainas.
Ndërkohë, analistët vlerësojnë se takimi mund të ketë rëndësi të madhe simbolike dhe diplomatike, edhe pse nuk pritet domosdoshmërisht të prodhojë marrëveshje konkrete.
Përballja diplomatike mes Trumpit, Putinit dhe Xi Jinpingut në Kinë pritet të jetë një nga ngjarjet më të rëndësishme ndërkombëtare të këtij muaji, në një kohë kur bota po përballet me konflikte dhe tensione të shumta gjeopolitike.
Burimet: Reuters, Associated Press dhe Al Jazeera.
