Sot, zemrat tona rrahin fort. Janë 27 vite që na ndajnë nga ajo ditë kur djemtë dhe vajzat tona dolën përballë rrezikut, vetëm me një ëndërr në shpirt: lirinë e Kosovës. Me pushkë në dorë, me penën që shkruante të vërtetën, me zemrën plot shpresë, ata u bënë dritë në errësirë.
Ne që jetojmë të lirë sot, jemi fryt i guximit të tyre. Çdo hap i yni mbi këtë tokë të lirë është një kujtim për ta, një zotim që kurrë nuk do të harrojmë. Liria që kemi nuk është dhuratë – është gjaku i derdhur, është dhembja e nënave, është sakrifica e brezave.
Tani është koha jonë. Të kujtojmë që liria kërkon përkujdesje, që paqja ndërtohet çdo ditë me drejtësi, respekt dhe dashuri për njëri-tjetrin. Kosova jonë ka vend për të gjithë – për ata që luftuan dhe ata që sot ndërtojnë, për gjuhët dhe kulturat që na pasurojnë, për miqtë që na qëndruan pranë dhe për fqinjët me të cilët duam të jetojmë në mirëkuptim.
Sot, përulemi me nderim dhe themi: faleminderit! Ju që dhatë gjithçka, jetoni përherë në kujtimin tonë.
Gëzuar përvjetorin e lirisë – një kujtim që na bashkon, një amanet që na udhëheq!
