Dy zyrtarët korrektues nga Kosova, të akuzuar për sulm ndaj një të burgosuri në burgun Vestre në Kopenhagë, janë liruar pas seancës paraprake të mbajtur të mërkurën.
Gjykata vlerësoi se nuk ekziston rreziku që ata të arratisen, pasi punojnë për Shërbimin Danez të Burgjeve dhe jetojnë në Danimarkë. Megjithatë, të dy mbeten të akuzuar dhe e mohojnë fajësinë.
Sipas aktakuzës, më 5 tetor ata dyshohet se kanë goditur disa herë një të burgosur në fytyrë dhe trup. Të dy u arrestuan më 6 tetor.
Pas rastit, Shërbimi Danez i Burgjeve ka bërë të ditur se do të rishikojë trajnimin e zyrtarëve korrektues nga Kosova. Aktualisht, 15 zyrtarë nga Kosova kanë përfunduar trajnimin në Danimarkë, ndërsa 19 të tjerë janë duke u trajnuar.
Danimarka planifikon që në fund të vitit 2027 ose në fillim të vitit 2028 të nisë transferimin e të burgosurve në Kosovë, në kuadër të marrëveshjes së vitit 2021.
